Celebramos a creación do blog do ramo da Hostalería.
A iniciativa, que provén dos compañeiros de Pontevedra, parécenos dun gran interese, xa que estamos ante un sector onde se cometen tantos atropelos contra os dereitos dos traballadores (e traballadoras, claro). Onde a inmigración sofre a discriminación máis brutal dos empresarios sen escrúpulos a cambio de míseros salarios. Onde os mozos e as mozas fan os seus primeiros “pinitos” como carne de precariedade, lista para entrar de cheo nun mercado laboral que cada vez demanda máis escravos. Onde os convenios que firman os “axentes socias” son pisoteados a diario polos que nos rouban a vida e nos subtraen a liberdade. E interésanos especialmente esta bitácora, pola súa organización por ramos da produción. Algo innovador por estes lares pero de seguro que obterá os seus froitos no futuro, como elemento de información e propaganda. Pero non pretenden os compañeiros de Pontevedra, deixar o tema a nivel local, senón que tódolos sindicatos ou secións de hostalería e comercio da CNT Galaica participen nesta iniciativa. Neste caso é a hostalería, pero sen dúbida outros compañeiros seguirán o seu exemplo no futuro. Non queremos pechar este artigo sen desexar desde a CNT de Lugo larga vida a este novo proxecto.
